ՀԱՐԳԵԼԻ՛ ԱՅՑԵԼՈՒ,

Պատիվ ունեմ Ձեզ ներկայացնելու մեր բժշկական հաստատությունը, որը գտնվում է Երևանի կենտրոնում՝ Մաշտոցի պողոտա 22 հասցեում: Այն Հայաստանի հնագույն կլինիկաներից մեկն է` հիմնադրված դեռևս 1931 թվականին: Հիմնադրման պահից մինչ օրս կլինիկայի մշտական ուշադրության կենտրոնում է եղել մանկաբարձության և գինեկոլոգիայի հայրենական դպրոցի զարգացումը, ինչն էլ իր հերթին մեծապես նպաստել է ծննդօգնության ոլորտում բարձրակարգ կադրերի պատրաստմանը:

Եվ պատահական չէ, որ Հայաստանում մանկաբարձության, գինեկոլոգիայի, պերինատոլոգիայի, նորածինների վերակենդանացման և ինտենսիվ բուժման, բժշկական գենետիկայի, վերարտադրողականության վերաբերյալ բոլոր ժամանակակից տեխնոլոգիաներն առաջին անգամ մշակվել և ներդրվել են մեր կենտրոնում:

Այսօր ՄՄԱՊԳՀԿ-ն, շնորհիվ առողջապահության, մասնավորապես, ծննդօգնության ոլորտում երկարամյա և բեղմնավոր աշխատանքի, ունի բժշկական բարձրակարգ հաստատության անբասիր վարկանիշ:
Մեզ մոտ բժշկական օգնությունը, ախտորոշման և խորհրդատվական ծառայությունները մատուցվում են կենտրոնի փորձառու, բժշկական բարձր որակավորում ունեցող աշխատակիցների կողմից: Կենտրոնում աշխատում են գիտության 3 դոկտորներ, բժշկական գիտությունների 20 թեկնածուներ և կենսաբանական գիտությունների 2 թեկնածուներ: Կենտրոնի բժիշկները մշտապես բարձրացնում են իրենց մասնագիտական վարպետությունը,  վերապատրաստվելով Ռուսաստանի Դաշնությունում և այլ երկրներում:

ՄՄԱՊՀԳԿ-ն առաջատարի վարկանիշը ձեռք է բերել ամենօրյա քրտնաջան աշխատանքի շնորհիվ, որի հիմքում ընկած են բարձր արհեստավարժությունը, հիվանդների և նրանց հարազատների նկատմամբ բարեհամբյուր և հարգալից վերաբերմունքը:

                     Պրոֆեսոր Գեորգի Գրիգորիի Օկոև